法網下周日就打開，26歲嘅舒拉寶娃肩負衞冕女單責任，不過都要四出搵真銀，周四佢就出席自家品牌糖果店宣傳，身穿黑色連身上衣同短褲仔，加上一對紅色高踭鞋，艷光四射。以2號種籽身份出戰女單，舒娃賽前公開大談同迪米度夫嘅姐弟戀，講自己第一次同比自己細嘅男士約會，不過目前為止一切順利；睇嚟22歲嘅保加利亞球手迪米度夫幾識冧女。另外，舒娃同拿度、莎蓮娜、費達拿4位「一剔」幫，晚上喺一個幾乎全黑環境，只見到螢光球衣、球拍及界線，試下打網球滋味。
法網周五亦完成抽籤，女單1號種籽、美國的「細威」莎蓮娜，首圈面對格魯吉亞的泰迪舒妮，舒娃面對中華台北的謝淑薇。男單方面，衞冕的拿度只屬第3種籽，如順利晉級，準決賽可能硬拼1號種籽迪祖高域。