身在美國嘅曼城同車路士，喺周四進行佢哋喺北美兩場表現賽嘅第一次交手，戰情都幾峯迴路轉。兩隊喺聖路易斯市碰頭，曼城喺下半場落後到0:3嘅情況下上演大逆轉，比賽最後半個鐘裏面連入4球以4:3反勝車仔。車仔輸波無傷大雅，臨別在即嘅領隊賓尼迪斯，據講會喺下季返去意甲發展。
賓帥料「落戶」拿玻里
有報道指賓尼迪斯嘅代表已經同意甲拿玻里傾掂數，前者將會簽訂兩年年薪350萬歐元（約3,500萬港元）嘅合約，日內會正式公佈落實。周四場波曼城喺落後到0:3後靠查維加西亞破蛋，加上迪斯高梅開二度同埋米卡李察士補時建功成功反勝。主辦單位借今場波為鄰近嘅奧克拉荷馬州出啲力，每出售一張門票就會捐1美元去基金，總捐款一共籌得13.5萬美元（約105萬港元）幫助當地近期受風災影響嘅市民。
曼城喺剛結束嘅球季四大皆空，球會行政總監蘇利安奴話目標要喺未來5年贏至少5個錦標；但同時保證就算下季冇盃落袋，新教練都唔會被炒。
另外，英國報章日前傳出摩連奴會喺下月2日去倫敦同車路士簽訂4年周薪25萬鎊合約正式加盟，喺本港網上討論區亦都引起熱烈討論。
