無綫落足本掟四億重奪世界盃獨家廣播權，雖然唔係全部賽事都喺免費台播，但球迷有22場「真」波同賽事精華睇，而唔使睇埋啲PlayStation一代起角公仔虛擬片段，真係開心都嚟唔切。最重要係可以睇無綫製作嘅世界盃節目，唯一可惜嘅係阿叔林尚義09年已經離開我哋，冇得再聽到佢嘅精采旁述。
煲煙入鏡
往事只堪回味，98年世界盃仲係無綫揸旗，阿叔、韓毓霞同郭家明就飛咗去法國直擊，當時直播法國對意大利嘅八強賽事，中場休息嗰陣，例牌搵吓人吹水攝時間。香港錄影廠嗰邊就由李克勤指揮，佢當時透過視象訪問郭家明對場波嘅睇法，阿叔唔為意自己入鏡，隨手喺衫袋拎包煙出嚟，仲將煙仔放喺口，錄影廠同事即時用對講機制止佢，雖然阿叔以零點零一秒整熄支煙，但成個錄影廠已響徹笑聲，克勤仲忍唔住寸阿叔：「我哋畀少少時間阿叔食少少嘢。」
阿叔不幸喺09年因病離世，呢個咁經典嘅蝦碌場面，就只有喺youtube度重溫嘞。
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！