睇「蘋果」，先知道自中文大學退休咗嘅郎咸平教授在內地演講，可以每場收22萬元人民幣，佢現在係「中大榮休教授」，因為在內地名氣咁響噹噹，一場演講勝於在中大做兩個月，走出校門去搵真銀，絕非秘撈，乃係好合乎理性嘅經濟行為，當然亦與做學問無關。
好多年前曾與台灣名士高信彊閒談，高先生以為左丁山搵好多錢，佢話：「以你嘅名氣，寫吓稿，一個月演講兩三次，到電視台出鏡三四次，好容易搵到八位數字啫。」左丁山大吃一驚，對高先生解釋，香港稿費不高，演講不值錢，到電視亮相，頂多收回車馬費，甚至要蝕埋的士費㖭。高先生不以為然，佢話佢在台灣寫吓稿，演講，到電視台評彈時事，收入已經相當唔錯，每次到電視台出吓鏡都有錢收嘅，香港電子媒體點解咁孤寒？佢仲勸左丁山一句：「你的國語非常普通，最好苦練發音，中國大陸會是你的金礦！」
可惜吖，高先生早已仙遊，左丁山仍未練好普通話，以普通話演講，無人聽得明白，因此有大陸電視台請左丁山講財經，大家見面傾咗一陣，來人已經知難而退咯！一位朋友在電視台做節目主持，佢話偶然有人邀請佢到內地演講一場，標準酬勞係五萬元人民幣，幾好搵㗎！
演講收費，乃英美傳統，克林頓，貝里雅卸任後周圍演講，搵銀無數，小布殊因口齒不清，有自知之明，好少公開演講，依家嘅奧巴馬口才厲害，2019年一月後，相信單靠演講就可以好快做千萬美元富翁。台灣首先向美國學習呢樣嘢，現在中國大陸學習得更快，而且中國市場大，商人出手鬥闊綽，好快就將台灣拋在後頭咯。
文化人應該贊成演講收錢呀，自己平時讀書思考，雖然未必做到真正大學問如錢穆、唐君毅、牟宗三，但畢竟文章與口才，係自己擁有嘅「資本財」，如果經常俾人拍膊頭，食餐飯就去免費演講，免費出鏡評論，未免對自己唔住，扮清高就會老年食清風，成為寒士，搞不好還要攞綜援吃生果金，何苦來由哉！