華置（127）主席劉鑾雄（大劉）多次稱病缺席澳門歐文龍賄賂案，噚日華置舉行股東會（AGM），據小股東所講，大劉同佢位公子劉鳴煒亦冇現身，兩位舊年已經缺席股東會，都唔知道班小股東幾咁想見兩位一面！小股東鄭伯話，大劉兩父子缺席令佢好失望，至於另一位董事、大劉女友呂麗君有冇到呢？鄭伯就話唔認得邊位係呂麗君。管理層喺會上亦冇提過澳門單官司。鄭伯持有華置多年，由幾毫子揸到十幾蚊，好有感情，對於澳門政府收回公司喺澳門幅地，鄭伯批評澳門政府做法不公平，仲話如果收番，就應該賠償咁話。