電影《美國處男》（American Pie）系列女星艾莉遜漢妮根（Alyson Hannigan），成日帶佢個開心又得意嘅囡囡Satyana出街，睇見小妹妹咁天真爛漫，真係替呢位靚媽開心。噚日兩母女去咗加州Culver City，被人影到拎住好多個氫氣球行，原來係為咗幫細女Keeva慶祝1歲生日，見到咁多波波，就算唔係自己牛一，Satyana都會high到爆燈啦，但正因為太多波喇，本來已經倒瀉籮蟹嘅艾莉遜幾乎俾啲波撞甩副超，之後返去攞車嗰陣，艾莉遜設法要將啲波塞入尾廂，點知中正頭獎俾度門撼到個頭，唔止頭頭碰着黑，直程係球球碰着媽㖭呀！
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！