星期一港股升四嚿水衝上23512，去到晉佳之前講嘅短線沽貨水平，不過之後真係少少時間都唔畀人吼位減貨，前日恒指雖跌一嚿水，但已睇得出洗倉潮嘅殺傷力，噚日再跌近600點。中間連正常嘅一兩日派貨過程都未見，港股就即刻隊落去，掟得咁急，資金真係十萬火急咁走貨，睇嚟唔會係小兒科。
美國聯儲局主席伯南克又話放水、又話收水，搞到大家估估吓，單係一個估字，就令到股市係咁插。事實上，當美歐日本幾個大國都行量寬時，利用貨幣擴張去刺激經濟呢招就快去到臨界點。𠵱家就開始出現轉捩點，就係總會有國家恃住其他國家印銀紙，自己就想褪軚，否則他朝各國印銀紙印到對刺激經濟都冇晒藥效，人人開始唔信印銀紙救到經濟呢招，就會走向環球長期滯脹嘅末路。
07年大奇蹟日或重現
講真，唔係逼到進退維谷，伯南克又點會畀個模稜兩可嘅答案大家呢？𠵱家美國身處兩難局面，收水會推跌美債價格、孳息上升，影響資產市場，但日本無限量寬又可能搞寸個party，齊齊放水，一係造成資產價格泡沫，一係就好似上段所講，將量寬行到極端，市場唔再相信量寬能夠支持經濟。如果唔畀市場掌握放水或收水嘅預期，反而可以暫時平衡到各種問題。
不過，如意算盤唔係咁易打得響，就係因為大家知道有機會收水，已足夠令股市跌到一仆一碌，債息又開始chok。美國可能收水同時，美金兌日圓之前又去到102、103，再跌去到110就到日本人驚驚，咁睇連日本量寬空間都捉襟見肘，股市近期嘅利好因素開始褪色，大戶惟有掟貨洩憤。
終於逼到股市大跌，下一步又點？晉佳覺得繼續恐慌落去嘅可能性唔細，如果逼到任何一方政府驚，要企出嚟做嘢，就可能逼出另一個07年大奇蹟日出嚟。反而個市唔大跌，就會死吓死吓派貨，咁樣仲難有轉機。所以𠵱家寧願留多啲現金，等轉機來臨。
晉佳
本欄逢周一、三及五刊出