特首辦新聞統籌專員鄧惠鈞以健康理由請辭，傳媒好似意料中事，冇乜反應。
其實早在宣佈佢走馬上任時，外邊已覺得奇怪，心戰大員點解會搵一個退休嬸嬸出任，而另一個合約中策組顧問關永圻亦屬退休人士，大半年後合約到期也低調離開。
新政府欠人脈班底，在起用幕僚人才時，盲舂舂獵頭。其實早在曾蔭權時代，整個傳媒環境已出現翻天覆地變化，主因是新媒體出現，八十後一代積極參與社會，已非舊一套「請客吃飯」、「幫手寫寫」，可以解決。
退休心態 協調有難度
鄧惠鈞已是上一代上晒岸公關人，同成個社會及媒體環境脫晒節，更何況認識前線記者，退休前任職馬會，財雄勢大，人人爭相巴結，務求當上馬會之友，根本就毋須乜嘢公關策略可言，同加入特首辦熱廚房，日日打仗，更不可同日而語。試問一個大機構退休高層，又有何能力上前線當指揮，進行政治角力呢？
坊間傳言特首心戰有AB Team， A隊屬正規軍，即特首辦內的新聞主任、統籌專員、政務助理、新聞處長、特首辦主任。B隊屬特種部隊、黨衞軍，即特首核心幕僚，包括邵善波、張志剛、張震遠、陳茂波、街外梁營人士公關顧問、齊心基金等。
兩個系統互不相屬，但應該互相配合，而居中協調者，就是新聞統籌專員。大家試想想，以鄧女士之退休人士工作心態、大機構作風，又點可以服眾呢？首先在A隊中，前朝時代經歷政治角力的政務官，實戰經驗豐富，要指揮專業部隊，必須身先士卒做榜樣。至於B隊，擅以政治謀略作思考，鄧女士對政治認識水平，又點可能同邵善波等人溝通呢。
如果無風無浪，特首民望平穩，即使投閒置散、耳鳴飛蚊，每個月穩袋近20萬元人工，也毋須立即跳船，但當風高浪急，就會保住自己形象而跳船走人。當政治領導，最重要係識得用人，而唔係事事自己落手落腳，用人標準也要揸得緊，用人唯才而非用人唯奴，用yes man最終只會玩死自己，將退休人士放在熱廚房，更是一大敗筆。
梁是否已孤立到無人可用，非也，外邊不少傳媒人也願意加入熱廚房的，畢竟20萬元人工，在傳媒行業是高薪，十幾二十年經驗者，人工一半也未到，問題只在於梁振英能否挑選到合適人選！
添馬男