65歲嘅財經專欄作家曹仁超，近日驚爆患上胃癌，幸而曹Sir懂得積極面對，噚日透露做完大手術，啱啱出院，聽佢講嘢中氣十足，但始終要多啲時間休息，總之家陣曹Sir冇事，粉絲可以鬆一口氣。
唔知噚日環球小股災
曹Sir本月初做身體檢查時發現有貧血，喺醫生建議下照胃部內窺鏡，竟然發現患上胃癌，旋即入院割除癌組織。回想上月中同曹Sir食晏，當時佢好多嘢講，好好胃口，估唔到一個月後發現患癌，好在發現得早，可以及早醫治。
曹Sir出院冇耐，話要多啲休息，就連噚日發生環球小股災都唔知。其實知唔知發生股災又有乜所謂吖，人生在世，最緊要活得健康快樂，工作只係生活嘅一部份，呢場大病正好提醒曹Sir健康幾咁重要。
李福兆成功抗癌
講起胃癌，自然想起84歲嘅「股壇教父」李福兆，佢半年前又係做身體檢查時發現患上胃癌，要切除三分二個胃，早排再度公開露面，明顯消瘦好多。曾經借800萬畀商交所主席張震遠應急嘅前立法會議員詹培忠，07年亦患過頸癌；同年，現為恒隆地產（101）董事總經理嘅陳南祿驗出患上肺癌，三人皆成功抗癌。
在此祝願大家身體健康，曹Sir早日康復。
李華華
mailto:[email protected]