2013年出現老牌食肆結業潮；屹立灣仔逾40年、見證本港最風光酒樓夜總會歷史的喜萬年酒樓，下月也遭迫遷。入行近40年的沙田凱悅酒店中菜廳「沙田18」主廚倪康健對此亦大感欷歔，憶述六十至七十年代五億探長呂樂時期，酒樓業最興旺，喜萬年更屬當年地標，夜夜笙歌，座無虛席。
50歲的倪師傅，12歲入行，在佐敦老牌酒樓鴻運當學徒，一直在廚房打滾，更曾飄洋過海到台灣、上海、武漢、東京工作，最近輾轉到了沙田凱悅當主廚。倪師傅回憶說：「呂樂嗰陣酒樓最好景，開親都賺錢，最巴閉係食足兩日嘅滿漢全席，埋單要10萬蚊。嗰陣買一個單位，講緊幾萬蚊。滿漢分大滿漢（逾百款菜）同小滿漢（60多款菜），我曾經做過小滿漢，食得好誇張。部份菜式𠵱家都絕迹，好似用雞冠入饌，你聽過未？」
憶九七前 客人「食到你驚」
倪師傅說，97年金融風暴前幾年，是本港飲食業最後的光輝歲月，「嗰陣我喺中環酒樓做廚，樓股皆升，中午食晏，啲客人食嘅前菜係鮑魚，鮑翅埋尾，真係食到你驚。啲鮑魚一箱箱咁去晒貨」。
風暴過後，飲食業也回歸平淡，近年樓價飆升，不少食肆捱不住貴租結業；嘴刁的港人，口味亦反璞歸真，喜吃最簡單的健康菜式，「好似番薯葉呢啲下價菜，以前冇人食，但係因為高纖有益，近年啲人爭住食，𠵱家喺街巿都好難買到」。
倪師傅也將下價的番薯葉，加上蓮子，變成入得酒店的「小葱湘蓮番薯」，並以此菜式與內地三間同系酒店師傅「較技」。四位來自不同酒店的中菜師傅，至下月9日前，各自炮製拿手地方菜，包括廣州、東莞、四川菜式，供客人選擇。倪師傅說：「想畀啲老饕一口氣試吓唔同地方菜。我作為廚師，都好想互相切磋、擦吓火花，咁先會學到嘢。」
記者：蔡朗清