搵公民黨湯家驊打官司，一啲都唔平㗎。但佢噚日自爆，有苦衷㗎喎。話說立法會噚日辯論維持有利營商環境議案期間，湯家驊發言時話，一年點都要打番一、兩場大官司，忙極都一定要打。點解呢？唔係因為驚唔打官司一排，會令頭腦同把口「生銹」，佢話呀，因為淨係靠立法會嗰8萬幾蚊月薪，根本交唔起律師樓成11萬蚊租！
佢話位於金鐘嘅律師樓，2010年已經加過一次租，當時由5萬蚊加到11萬，已經牙痛咁聲。適逢今年又要再傾租金，佢保守估計，怕且都要加多六、七成呀。佢話舖租貴會令好多嘢轉嫁畀消費者，最終受苦嘅係市民，力促政府高度關注兼解決。