朗尼下季仲係唔係紅魔？睇嚟唔似嘞。英國傳媒話，朗尼會以1億鎊（約11.7億港元）嘅天價由曼聯過檔法甲豪門巴黎聖日耳門（PSG），其中4,000萬鎊係轉會費；佢嘅年薪就會高達1,500萬鎊（約1.7億港元），而且仲係除稅後㖭！
費格遜本月12日喺自己場奧脫福告別戰（曼聯主場勝史雲斯2:1）爆響口，話朗尼賽前要求離隊，但就俾佢哋拒絕咗；消息指，將會喺7月1日正式接替退休費爵爺做曼聯揸弗人嘅莫耶斯，會坐低同朗尼傾吓去留問題。不過，由於朗尼始終唔後生，到咗10月就滿28歲，所以如有球會出得起錢，佢哋亦唔介意畀朗尼離隊。
年薪1.7億拍得住伊巴
英國《鏡報》就爆料，指有中東財團撐腰嘅PSG計劃同曼聯做單大買賣。據報，PSG會出4,000萬鎊收購朗尼，而且畀份除稅後總值6,000萬鎊嘅4年合約佢，令到佢喺人工上可以同瑞典球星伊巴謙莫域睇齊。不過，亦有報道指PSG仲未向朗尼展開正式斟介。
講真，朗尼話就話係超級球星，但問題係佢吸引唔到巴塞隆拿、皇家馬德里、拜仁慕尼黑同埋曼城等大會，所以如果真係走人，選擇真係唔多。話晒PSG係法甲大會，又出得起錢同踢到下屆歐聯，若然單料係堅，相信朗尼亦樂意同佢老婆及兩個仔，由曼徹斯特搬去巴黎生活。報道仲話，曼聯早就贒中多蒙特嘅24歲波蘭前鋒羅拔利雲度夫斯基；如果可以喺朗尼身上套現4,000萬鎊，就有資金去同拜仁爭羅拔仔。朗尼傳走人，但34歲老將後衞里奧費迪南就啱啱續約曼聯1年，留效至出年6月底。
史高斯踢奧脫福慈善賽
另一方面，同費爵爺一齊喺季尾退休嘅曼聯中場史高斯（左圖），答應咗喺下月2號返奧脫福，參加一個命為紅心聯（The Red Heart United）名人慈善賽。屆時史高斯將會聯同白賴仁笠臣、高爾、史譚、雲達沙等曼聯名宿，同有施丹、費高及馬基列尼等名將嘅皇馬，進行次回合比賽；首回合舊年喺巴拿比奴上演，結果皇馬贏曼聯3:2，該項賽事所有收入會撥捐曼聯基金，史高斯話：「場波雖然係為慈善，但一啲都唔易踢㗎！」