聯儲局主席伯南克一招先甜後苦，玩轉全球股市！佢周三出席國會聽證會時，一開波就話收水會影響復蘇進度，美股聞雞起舞，再創新高，點知講講吓又話未來唔排除會減少買債規模，搞到美股倒跌收場，股民俾佢呃晒。滙豐噚日朝公佈中國製造業PMI數據，驚嚇地跌穿50嘅盛衰分界線，亞洲股市急轉直下，日股更上演高台跳水，埋單狂插7.3%，港股亦蒸發591點收場。
最令人擔憂係成交急增至超過800億銀，反映沽壓極大，後市勢將考驗50日線22477水平。現階段博反彈，強勢股屬優先選擇，貪其跌得殘彈得急。
比亞迪電子（285）4月展開升浪，個半月炒高逾一倍，多得摩通連環出報告唱好，指其HTC One機殼接單旺爆，三星及蘋果生意佔比亦逾一成，盡收天下兵器。該股昨收4.35元，逆市升0.9%，以黃金比率計高位回調0.236倍，剛好落在噚日低位4.26元附近，證明該水平有一定支持力，戰友博反彈可以此作計數位。
唐牛