巨鴨Rubber Duck近期成為港人心靈雞湯，個個爭住去睇鴨，治療因為狼班子烏煙瘴氣而造成嘅創傷。一班真光女書院學生噚日亦齊齊為鴨狂，去到海港城實地為隻鴨寫生；現場所見，唔少市民影鴨之餘又影埋班女學生，真光妹同隻鴨一樣咁受歡迎喎。
市民圍觀 成另一景點
噚日嘅海港城海運大廈露天停車場，變身露天畫室，十幾個中三至中五嘅真光女書院學生，即席揮筆畫出一隻又一隻象徵愛與和平嘅巨鴨。呢班女學生一抵埗，已經興奮莫名，「嘩」聲不絕；擺好架生後，就聚精會神咁畫鴨。
美少女加得意鴨，真係令人心曠神怡，如此靚景更加成為另一景點。八方所見，唔少原本影鴨嘅遊人，亦好熱衷於影班女學生畫鴨：雖然身邊有好多人圍觀，但班學生冇受影響，專注創作，最終有啲作品展示隻鴨連繫世界，亦有學生透過畫鴨反映童年嘅快樂回憶。
負責帶隊嘅視覺藝術科主任胡麗瑩老師大讚學生作品very good，更透露班學生早前已經影定相，做足research，畫畫時零舍得心應手。胡老師話呀，全城熱talk嘅Rubber Duck象徵和平與愛，對全港人都好有感染力，所以好希望學生藉此培養正面價值觀，散發更多正能量。
mailto:[email protected]