美國便服品牌A&F舊年以肌肉男「胸」襲香港，吸引唔少港女捧場，爭住攬實佢哋影相；其中三個肌肉男仲走勻全港，自拍六分鐘喺香港遊山玩水嘅短片放上網冧粉絲。其間佢哋去過大潭水塘喪玩跳水，怕且佢哋都唔知自己已經觸犯香港法例喇。
水務署話呀，水塘水係食用水，唔可以畀人跳水，違法會被檢控，最高罰五萬蚊同監禁兩年㗎。之但係呢，法例同時規定檢控期限為半年，即係過咗期，就唔可以告㗎嘞，所以縱使有肌男「罪證」短片在手，都無從入手，任由佢哋「逃之夭夭」。查實大潭水塘向來都係非法跳水嘅熱點，今年至今水務署就收到兩宗舉報，都係發生喺大潭。