F1第6站今個周末喺摩納哥賭城蒙地卡羅上演，一班車手提早去到呢個不夜之城，又玩水上電單車，又去踢波，似度假多過開工！今次仲有多位車手推出特別版頭盔，未開賽都先用裝備鬥一番。
黑帝玩水帶埋愛犬
蒙地卡羅喺1929年舉行首屆摩納哥站賽事，已經有84年歷史，每年都係F1嘅盛會，吸引唔少名人去睇比賽。一班車手都提早去到摩納哥，不過就唔係為今站賽事做準備，而係嚟玩！平治「黑帝」咸姆頓一早已經到達，但係周二唔係去睇吓個賽車場，而係去打golf，仲帶埋愛犬Roscoe去；不過天氣睇嚟好熱，黑帝隻狗仔要喺高球袋後面避暑，認真冇陰公。之後周三佢同隊友羅斯保去咗玩水上電單車，兩個玩得勁開心，好似呢個星期係假期，兩個人去咗度假咁。
另一邊廂，法拉利嘅馬沙早前都到咗不夜之城，仲參加咗每年都會舉行嘅足球賽，同場有塞爾維亞網球「1哥」迪祖高域。玩還玩，各人周四都收拾好心情，認真開工，進行試車。麥拿侖車手佩雷斯仲一早起身，影低蒙地卡羅日出，同一眾車迷講早晨！
唔少車手都會喺呢一站用別注版頭盔，好似咸仔咁，就將自己、女友妮歌同Roscoe嘅公仔印上頭盔後面sell可愛。佩雷斯亦有特別版頭盔，今站之後仲會拎去拍賣做善事。另一位法拉利車手艾朗素，今年繼續用金色做主色，數留番自己所有分站冠軍，盡顯王者味道。
