拜仁慕尼黑上屆歐聯決賽射輸12碼，結果喺主場安聯將個冠軍送畀車路士。所謂「見過鬼都怕黑」，拜仁中場湯馬士梅拿賽前就苦練12碼，仲要1日射成60球咁多，真係要寫個服字畀佢。
「係時候贏歐聯冠軍」
德國球隊向來擅射12碼，點知喺上屆場歐聯決賽就俾人打爛金漆招牌，拜仁喺互射12碼以3:4不敵英超車路士；禮拜六同佢哋爭歐聯冠軍嘅多蒙特都係來自德甲，12碼有番咁上下。為免歷史重演，湯馬士梅拿前日喺練完波後就留低練射12碼，先搵後備門將拉達練習，之後再對正選門將紐亞，仲射咗成50、60球12碼咁多。話時話，上屆佢因為喺完場前被換走，結果冇份幫球隊射12碼；家陣佢咁有誠意，賽前狂操12碼，睇嚟教練希歷基斯喺擬定劊子手人選，應該會預埋佢。
湯馬士梅拿就話：「對我嚟講，係時候贏番個歐聯冠軍。如果3次都係決賽輸波，你就注定做失敗者。」除咗上屆，湯馬士梅拿都踢過2010年場歐聯決賽，點知拜仁以0:2輸畀當時由摩連奴領軍嘅意甲球隊國際米蘭。換言之，如果禮拜六佢有份打，就會係佢人生第3場歐聯決賽。不過，啱啱傷癒復操嘅後衞畢斯杜巴因膝頭嚴重受傷而休息10個月，對拜仁來講肯定係壞消息。
葛斯復操未掂決賽out咗
至於多蒙特都可能練緊12碼，但佢哋教練高路普最關心嘅，反而係來季過檔拜仁嘅馬里奧葛斯可唔可以趕及喺禮拜六上陣。馬里奧葛斯喺上月尾對西甲皇家馬德里場歐聯4強次回合拉傷大腿，按原來計劃喺前日復操；點知佢練咗半小時就擰晒頭，唔可以繼續練，之後仲話決賽唔出得。
多蒙特話喺禮拜三進行詳細檢查之後，確定佢踢唔踢到場決賽；呢位20歲德國中場喺今屆歐聯踢咗11場，入咗2球同埋有5次助攻，佢今次缺席，肯定削弱蜜蜂兵團嘅鋒力。
特稿：新保羅貼蜜蜂兵捧歐聯
點解啲球員咁想去英超踢波？之唔係搵得多囉！諾域治喺今季英超成功護級，聽講每個球員有成25萬鎊落袋。俾人叫「新保羅」嘅八爪魚就預測多蒙特可成為今屆歐聯冠軍，話晒「保羅」喺南非世界盃貼波常中，睇嚟「新保羅」都應該有料到啩。就算多軍禮拜六場決賽真係贏到拜仁捧盃，佢哋班球員都係每人分到126,000鎊（約148萬港元），比諾域治班球員仲少一半，同舊年捧盃嘅車路士（每人30萬鎊）更加係蚊髀同牛髀；不過對喺歐聯決賽前同女友珍妮結婚嘅多軍後衞舒姆沙，呢百五萬夠佢哋度蜜月。