新能源股一向夠鑊氣，政策上有任何風吹草動，閒閒哋都炒高炒低逾一成。想揀隻風險冇咁大嘅，可以留意華電系旗下的華電福新（816），不但具有環保概念，最重要是背景雄厚，母公司是國企中國華電集團，同系兄弟是華電國際（1071）。
美林唱好睇2.75元
華電福新暫時主要單一收入來源仍然是火力發電，但水力、風力發電及清潔能源業務已經佔總收入超過一半，盈利增幅更遠超火力發電，前景亮麗。
雖然首季少賺46%至2.6億元人民幣，但若不計去年一次性收益，經常性溢利增長實際上是持平。
美銀美林表示，自5月份開始雨水量已明顯急增，有利水力發電表現，華電福新今年水力發電量目標亦超過該行預測。另外，該公司約四成風電場位於新疆及甘肅，預計風電場的利用小時將會在第四季或明年第一季反彈。最重要是，華電福新目前估值平，就算該行將目標價由2.55元上調至2.75元，PE都仲低過環球同業，所以美林繼續唱好叫入貨。
睇番華電福新走勢圖，由3月初至今累積升幅一度超過六成，在2.75元明顯見阻力，RSI及STC早已響起超買訊號，形成三支陰燭，但成交不算太大，相信是正常調整。該股昨收2.39元，若能守穩2元，不妨趁低吸納，再等下一輪炒風。
瑪姬兒