今日小弟介紹中國電子信息產業集團旗下嘅南京熊貓電子（553）。隻股係老牌國企，1996年上市，H股上市價2.13元，A股就5.10元人仔，上市多年，無論盈利同股價表現都係一般，間中炒一轉。不過，近月好似轉晒強勢，由上月22日2.50元水平起步，抽升60%高見4.02元，應該有啲嘢。
南京熊貓多年前主要業務係同愛立信合作生產手機，生意唔差，不過公司本身經營不善，欠落好多街數，2005年連控股股東南京熊貓電子集團所持嘅內資股都被中國銀行凍結。不過，經連番重組後，南京熊貓輾轉被納入中國電子信息產業集團旗下，由較低檔的電子公司提升為中高端電子集團，夥伴變為食埋愛立信嘅Sony，仲由以前做代工晉升為拍檔。要解釋近期轉強原因，莫過於母公司計劃注入高增值項目。去年底南京熊貓宣佈計劃以每股不低於5.07元（人民幣．下同），發行約2.6億股新A股，集資約13億元。母公司已承諾出資2億元認購新股，其他將批售畀機構投資者。增發股票已獲中證監批准，料今年內進行。若成功批售，南京熊貓嘅股東資金將由16億元急增至接近30億元，NAV由2.50元提升至3.70元。
首站目標價4.5元
據管理層解畫，集資所得會投資自動化裝備、通訊裝備同交通電子項目，每年盈利料將因此增加約3億元（現約1億元多啲）。
就因批股集資搞注資，南京熊貓A股已經炒到癲晒，近期由6元水平升至近10元，昨收9.20元。當然，H股同期升幅相若，但A股發行量只係H股嘅十分之一，照計A股可以挾得再癲啲，咁H股又可以跟升喇。H/A股𠵱家股價折讓咁大，又一個炒上條件。
同系嘅中國電子（085）近日證實向母公司商討新一輪注資，股價已極速低位升近一倍。可見中國電子信息產業集團已準備向旗下各子公司做嘢，南京熊貓應可受惠，難得股價由高位回調咗兩日，可趁低吸納博破頂，目標價先博與A股折讓收窄至五成，即約4.50港元水平。
陳承龍
本欄逢周四刊登