如果特區政府是一間上市公司，相信已被監管當局勒令停牌。作為CEO，狼英其身不正，僭建醜聞一大堆，多說話少做事，完全未有履行話事人應有責任，將股東（香港市民）利益置於一旁；班手下品格同樣令人懷疑，最新鮮滾熱辣嘅莫過於頭號梁粉張震遠。佢打骰嘅商交所，狂燒錢兼爆煲，𠵱家仲搞到商罪科出手調查，本港金融中心地位大打折扣。
本欄見報之時，儲局主席伯南克已在國會發言，噚日港股雖跌105點，但唔少之前熱炒嘅明星股如華能國際（902）、百勤油服（2178）、青蛙王子（1259）都跌到一仆一碌，反映大家都驚咗阿伯會講退市，寧願袋袋平安，亦應驗本欄之前所講，要突破1月初嘅「蟹竇」絕亦易事。
另一股王領匯（823），噚日亦回吐1.2%，失守起自去年中以來嘅升軌，技術走勢轉差，現價息率只得3.1厘，買嚟收息未係時候，不如睇吓呢排有冇恐慌性沽盤出籠，去番40蚊樓下先同佢死過。
唐牛