陳法拉與飛行結緣，在無綫新劇飾演機師，穿梭英國、法國與台灣等地拍攝，在戲外更熱衷於周遊列國，在沒有通告的日子即興出發。色彩鮮艷的行李箱是法拉心水，今次她示範的國際旅遊裝備品牌Tumi，與美籍華裔設計師Anna Sui合作，印有紫色花卉圖案的旅遊用品充滿東方嫵媚，讓法拉成為出眾的旅遊達人。
旅行，無人不愛，陳法拉都不例外。她喜歡旅遊的理由，不是為與男友薛世恆甜蜜共對，或與好友嘻哈歡聚，旅遊是她的心靈雞湯，她說：「旅行對我嚟講係cleansing，洗甩喺香港工作、生活上嘅煩惱，離開呢個環境，好似脫離角色，令我可以重新出發。去旅行時唔會夜蒲，係睇風景，食吓嘢，睇電視，好hea。我唔可以定落嚟，唔鍾意重複去，要去未去過嘅地方體驗世界，但去剩嘅地方唔多，剩番南半球。」性格獨立的她，在讀書時期已經挑戰獨自外遊，現時更愛玩即興：「見到之後幾日冇通告，會抽起條筋，即刻上網搵機票，唔事先計劃咁出發先開心。」
金色篋搶鏡
法拉的男友工作忙碌，當然未能時刻相伴，孤身上路不會令男友擔心？她說：「唔會，所有嘢上網可以即時聯絡到，以前試過喺荒山野嶺查地圖，𠵱家交通及地圖都上網搵到。」她習慣獨行，其實內心卻欠缺安全感：「我性格幾女仔，女仔好多都缺乏安全感，加上係雙魚座，好感性同情緒化。」在旅途上，惟有靠行李箱給予安全感，她還視之為好友。
法拉在台下不忘保持星光，愛以色彩鮮艷的行李箱突出自己，她說：「拍《衝上雲霄II》去英國、法國，差唔多一個月，我個金色Tumi篋最突出，掛埋initial tag上去，大家都知係我。篋好難認，所以最鍾意鮮艷顏色，Anna Sui for Tumi系列個紫色仲靚，圖案充滿東方色彩，花紋重叠，造出lace感覺。」
採訪：林嘉慈
攝影：林德雄
貼心拉鏈間隔
行李箱及手袋新作印花靈感源自Anna Sui 2009年春季系列，以重叠線條繪出各式菊花與綠葉，與Tumi的莓紅及紫羅蘭底色完美融合。其中的衣物袋設計貼心，內藏三個拉鏈袋作為間隔。
化妝：Mon of Annie G. Make Up Centre
髮型：Kiff Lui（P.O.P Eight）
服裝：3.1 Phillip Lim
場地：Assaggio Trattoria Italiana
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！