【中環】有「豬扒港姐」之稱的張嘉兒去年跟鄧健泓傳緋聞，兩人多次被影到鬼祟拍拖，還以為他們打風都打唔甩，怎知前日張嘉兒竟背住鄧健泓暗媾大隻男！二人在中環睇戲斷正，不知她跟鄧健泓已悄悄玩完，還是一腳踏兩船！
死撐是朋友
前日下午4時40分，刻意戴口罩遮掩容貌的張嘉兒現身中環ifc，身穿貼身衫的她身材玲瓏浮凸，惟身旁的觀音兵卻不是緋聞男友鄧健泓，而是一位身材高大健碩的男子，他們搭扶手電梯行往戲院方向。其間記者開聲叫張嘉兒，初時她沒有理睬，竟扮自己不是張嘉兒，記者連叫她的名字多次，最後她惟有死死氣地揮手打招呼。
被撞破好事的張嘉兒與大隻男快步走入戲院，約晚上7時散場，二人雙雙離去，問到是否跟男友睇戲？張嘉兒邊行邊說：「唔係，朋友啫，我走喇，拜拜！」其實上月已有讀者爆料指張嘉兒與大隻男在將軍澳睇戲，今勻被本報斷正，難怪張嘉兒急閃！
曾傳跟金剛拍拖的張嘉兒，去年尾被指介入鄧健泓與龔嘉欣戀情做小三，搞到他們分手收場，嘉欣好友姚子羚睇唔過眼，曾代出頭嘲鄧健泓鍾意鋸扒，明寸「豬扒港姐」。由於被緋聞拖累形象，二人工作量都減少，張嘉兒與鄧健泓更死口唔認拍拖，卻多次被影到他們鬼祟密會，對上一次是本年1月被影到去尖沙嘴撐枱腳，怎知事隔數月，張嘉兒似乎已換畫。
採訪、攝影：彭琮然
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！