狂風暴雨下，愛港力依舊出動，幫阿爺做打手，使唔使咁搏呀？唔通黑雨開工有雙工？新民主同盟范國威話呀，佢喺粉嶺華明邨嘅地區辦事處，門外報告板上宣傳六四燭光集會嘅海報（圖），竟然俾人寫上有「做個愛黨愛國中國人 不做港英奴才英國狗」嘅貼紙，貼紙右下方仲署名「愛護香港力量」。一張神聖海報就咁被污衊，咖喱飯堅嬲，即時報警處理。咖喱飯話呀，辦事處職員前晚8點放工時，都未見有關貼紙，事前亦冇收到有關人士嘅騷擾，難以估計疑犯身份。佢強烈譴責呢種破壞行為，話大家可以透過唔同方式表達對六四嘅意見啫，唔使惡意毀壞他人財物㗎，力促警方徹查。