【拒絕減租】
車廠減價促銷、燃料成本大減，惟的士車行無意減租或減車費，料司機及乘客皆無法受惠。業界代表指出，新車落地最終是肥了車行，「司機一直被剝削，慳咗油費，都被加租食番」。
車行壟斷的士牌
以比亞迪（1211）電動的士為例，比亞迪以月租8,000元、包維修方式租予的士車行，車行再以「判上判」方式，每日900元租予司機，全月計賺凸19,000元。
的士小巴權益關注大聯盟主席黎銘洪稱，「被中間剝削，就算你慳咗30蚊石油氣費，車行都加番20蚊租，車行冇死錯人嘅」。
司機楊生亦認為，即使新車到埗，成本及燃料費下降，車租亦不會減，「最緊要係的士牌俾人炒高，你唔揸咪搵第二個人揸」。他批評的士牌被幾大車行壟斷，影響生計。
有份引入比亞迪的香港的士小巴商總會會長兼理事長王仲強反駁，沒有剝削司機，「牌費成本、保險、每日五小時停車場費，加埋車租，成本已經2.8萬，我哋仲要補貼少少」。
王仲強又指出，在深圳乘搭電動的士，可以免收3元燃油附加費，但香港即使引入電動車，車資亦無可能減，「要好多程序，又要經立法會，皮費平咗，咪最多唔申請加價」。