立法會拉完布，大家都要唞一唞，議事廳噚日都好靜，立法會秘書長陳維安更會喺今日起連放四日假，去參加喺烏溪沙青年新村舉行、由國際著名佛學大師一行禪師主持嘅禪修營。呢個營嘅名額一早已經爆滿；2010年一行禪師嚟港時，陳維安原來都有入營禪修㗎。
係咪覺得社會太嘈吵，響鐘點人數聲音太困擾，覺得要入營避靜先？本身係天主教徒嘅陳維安只係話，禪修可以幫到自己心靈成長。早前一行禪師嘅徒弟法欽法師，寄語港人唔好只係做低頭族，陳維安因此唔帶電腦入營，但係手提電話就唔帶唔得嘞。咁又係，身為秘書長喎，立法會一旦出事，梗係要出營搞掂佢啦。