秀茂坪順安道喺暴雨下發生山泥傾瀉，一般人喺危險情況下，梗係避之則吉，免添煩添亂。之但係民建聯陳鑑林係九龍東直選議員，阿仔陳俊傑嚟緊個星期日又要喺觀塘坪石區議會補選決戰長毛，身為老竇嘅陳鑑林梗係落力拉票，如果阿仔輸咗，咪好冇「飛屎」？所以噚日發生山泥傾瀉後，陳鑑林即刻扮幹勁十足飛落現場實地視察；佢黨友做好心，喺facebook幫佢上載咗張視察相，點知就惹嚟市民大鬧。鬧乜嘢？原來有人留言，話喺山泥傾瀉下去到事發現場，簡直係置救援人員於不顧，覺得咁樣同八號波去海邊吹風衝浪，有乜嘢分別？唔知陳鑑林會唔會好好反省呢？