亞視舊年年底搞咗個「演藝訓練計劃」洗腦班，硬性規定藝員一定要上堂，戚黛黛、張啟樂等五個藝員因為無故缺席同拒絕上堂而俾人炒魷，嚇到個個冇乜工開、收入唔多嘅都唔敢遲到或缺席，下下搭的士趕返學，經典到爆！
噚日凌晨，天文台發出黑色暴雨警告，勞工處指引列明，為咗僱員安全着想，僱主唔應該要求僱員返工，不過亞視呢班學生就受惠唔到，個個狼狽趕返去上堂，真係冇陰功！「亞洲之子」亢帥克都喺微博度寸咗一句：「亞洲大學堂是不會停課的！」而被炒嘅張啟樂就喺微博度話：「今日黑雨都要啲藝員準時十點返去上堂？咁中途有事邊個負責？」
上完堂嘅亢帥克接受電話訪問時話：「九點幾收到公司電話，黑雨都冇得停課，叫我十點要返到，趕唔切就當遲到！」好在亢帥克住大埔趕得切，咁會唔會投訴黑雨都要返學？佢就話：「有啲人會啩？對我冇影響，因為住得好近，又有公司車接送。」
蔡國威請病假
原本都要上堂嘅林紫君同蔡國威，都分別因為感冒同腸胃炎請假冇返，威仔知道同事黑雨要返，喺電話度話：「凡係黑雨或八號風球，任何人都知應該留喺安全嘅地方，上堂係可以增值自己，但係咪要到黑雨都上堂咁逼切呢？遇到意外點算？除非做直播，公司係咪應該體恤吓呢？」問到張啟樂係咪走得快好世界？佢避重就輕咁話：「仲喺度唔知點算，好無奈！」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！