電視廣播（511．TVB）噚日中午首度喺將軍澳電視城舉行股東會，理由係想小股東知道電視城係點，點知遇上三年來首次黑雨，非執董陳國強、方逸華、獨董柯清輝等當然有到，但小股東只得十幾人，相對往年喺尖東五星級酒店開股東會有三、四十人，場面冷清好多。
現場所見，小股東投票後，走到會場後面享用自助餐，之後就坐公司專車離開，冇參觀電視城環節，遑論有機會見到陳豪、黎耀祥等嚟個大合照。小股東除咗知道電視城咁近堆填區之外，究竟仲知道乜嘢呢？
TVB冇租酒店開股東會，又唔等於慳番筆喎。據講，TVB專登搵工程部同事搭咗個同酒店一樣嘅全新場景，又搵嚟幫襯開嘅五星級酒店自助餐到會，總開支多過喺酒店搞。開支多咗，小股東少咗，為乜呢？