去年為狼振英助選時係威係勢嘅張震遠，原來表面風光、內裏坎坷；聲譽輸清光，商交所都好難重光。最可憐係有無辜少女慘受牽連嘛。邊個咁陰功？咪就係獲狼振英重用嘅前共青團成員陳冉囉。事關佢離開候任特首辦後，獲狼振英推薦去做震遠主席個助理，點估到上錯賊船吖！有政界中人話，換轉佢係陳冉，唔嬲就假！
前戰友個個泊到好碼頭
八方唔係杞人憂天㗎！張震遠聲譽一鋪清袋，聽聞幫佢做嘢嘅人，𠵱家都人心惶惶，尤其商交所搞到咁嘅地步，邊度仲有生意？聽聞入面員工驚執笠又驚冇糧出；跳船，只係遲早嘅事啫。
最多人關心嘅梗係陳冉BB啦。事關佢喺狼振英推薦下，入咗商交所做主席助理嘛。照咁睇嚟，前程似「咁」噃。有政界中人話出嚟做嘢，最緊要跟到好老細，質疑狼振英係咪玩緊呢位入世未深嘅小妹妹呢？
睇見當時同自己一齊喺候任辦做嘢嘅洪綺敏同馮英倫，分別泊到好碼頭，前者跟岳少搞地產，後者任亞太交流與合作基金會執行副主席助理，陳冉點會唔感懷身世？八方噚日打過電話畀佢，想問佢有乜嘢打算，有把好似佢嘅溫柔而帶點鄉音嘅聲線，叫八方留低問題同電話號碼，之後就一直冇回音咯，可能有人仲為前路閉翳ing啦。
而張震遠有份成立嘅齊心基金，早前盛傳暫定今年7月出爐㗎，但𠵱家出唔出到台，都好多變數喎。齊心基金𠵱家喺金鐘統一中心租咗個辦公室做嘢，仲有職員㗎；唔知佢哋嘅飯碗，又穩唔穩陣呢？
mailto:[email protected]