暴雨襲港搞到停市半日，唔少網民因「李氏力場」失靈而雀躍。菲菲都認為呢股力量將越來越弱，講緊嘅唔係李氏擋風雨嘅大能減退，而係長和系面臨「李澤鉅折讓」（Victor Discount）。
好似碼頭工潮事件，最終竟演變成政治危機，令和黃（013）進退失據；雍澄軒事件更加係賠了夫人又折兵。單憑呢兩件事，實難免令人覺得小超處事功架、實力都不及超人，由佢接班，長和似乎難保霸主地位。
睇埋小超下面嘅頭馬，霍建寧回應碼頭罷工，出口護主變火上加油；趙國雄原本諗住推銷雍澄軒，點知反成單刁嘅催命符。有「李澤鉅折讓」都算，兩個打工皇帝不但扶助幼主登基不力，反而一冇咗超人睇住就出事，變相小超嘅「附屬」亦要額外折讓。
折讓再折讓，長和系長遠前景的確唔明朗。不過有如蘋果公司咁，冇咗Steve Jobs後，股價會衝高一排先回落，意味此類折讓多數會滯後，所以相信長和股價仍未反映上述負面因素。
Fifi
本欄逢周二、四刊出