猶記得證監會（SFC）行政總裁歐達禮今年初同傳媒春茗時，開場白係話今年大家一定有料寫，華華當時仲以為佢隨便講吓，所謂嘅料都係諮詢文件之類，點知半年未過已經有幾單大嘢出爐，包括叫停長實（001）雍澄軒交易、調查商交所，查咗四年嘅滙控（005）33蚊事件亦有結果，唔係不了了之，香港真係勝在有SFC！
好多人唔明白，面對呢幾單公眾相當關注嘅個案，點解證監會一直唔公開講解當中細節。消息人士就話，呢個其實只係證監會嘅慣常做法，證監會經常有執法行動，小至證券行經紀，大至證券行甚至長實，從來唔會高調解構個別個案。話雖如此，市民總會希望證監會能夠特事特辦。