呢個世界買股票，同孫柏文教女仔媾仔一樣，都係冇「有毒資產」，只有「有毒價錢」。更核輻射嘅股票，只要價錢夠平，都買得過。相反，更靚嘅靚女，如果對一個男人來講，代價太大，例如要傾家蕩產先能令個女仔開心，呢個女仔會冇人追。
大家可能要我提供例子。今年全球升幅差不多最勁之股份，升咗三倍，就係爆咗日本福島核電站嘅經營公司──東京電力株式会社。又例如，件件港女都講到如果自己係上市公司，就要畢菲特咁嘅質素的投資者去私有化。
咁我問啲港女知唔知畢菲特買嘢點揀，投資法係乜？佢哋會話價值投資法。咁我就會問，咁你哋有冇咁嘅價值先？啲會考廿幾、三十分嘅港女就會話：「我好有價值呀！你講乜呀？X你啦！X街！」啲質高港女唔明嘅係，畢菲特投資前，除咗睇你嘅價值外，仲要睇你賣乜價？你賣到好似當年阿里巴巴上市首日嘅收市價咁，即係300倍市盈率時，你估畢菲特會唔會用呢個價私有化咗你？我舊年喺《盛女愛作戰》話第一次約會，約去麥當勞，就係睇吓對方肯唔肯喺市價以下批貨畀我。
毒資產補品價
講完咁多，最後提供多個世界上冇「有毒資產」的例子畀大家。大家有冇留意，我從未試過叫大家買煤炭股。因為成個板塊我一路都唔覺得值。不過你睇兗州煤業（1171），已經跌到落去5倍市盈率，即係個價已經低過資產淨值（PB低過1，唔好話畢菲特，連佢師傅Graham都鍾意）。我同以前商台《骷髏會》啲同事，同埋梁心欣都傾過。兗煤由年初14蚊跌到落8個幾之後，仲有冇得跌？我唔知，不過就算跌，佢都應該先急速咁彈一彈番上10元，比現價高兩成。毒資產，不過補品價，仲唔買？
孫柏文
獨立股評人
http://facebook.com/shuen
本欄逢周二、四刊出