【第66屆康城影展之花樣年華】若演技是葡萄酒，越嗒越有味，那劉嘉玲肯定是一瓶高質葡萄酒。她在電影《過界》中扮演上流社會名媛，被美國《Variety》雜誌影評人激讚是全片亮點，現年47歲的她日前在康城接受本報專訪，透露不論演技或人生，現今正是最佳時刻。她又希望能像《愛》（Amour）的86歲法國老牌女星艾曼妞烈華（Emmanuelle Riva），演戲演到老。
撰文：文國駿
劉嘉玲與陳坤主演、新晉導演劉韻文執導的電影《過界》，入圍康城電影節「一種關注」單元，嘉玲的演技備受外國媒體激讚。日前她在康城接受本報專訪，在海邊拍照時全程自動自覺擺出多個甫士，心情和狀態甚佳。原來當初嘉玲看到劇本時興趣不大，因對方是新導演，感到沒安全感，但後來促成合作，全因一念，就是給後輩實現夢想，她說：「我都考慮好耐，同導演見過好多次，佢都調整劇本幾次。我欣賞佢堅持，亦覺得應該畀機會年輕人實現夢想。我年輕時都有人畀機會我，我𠵱家有能力都應該幫番人，咁先有意義，而且全人類都拍商業片時佢堅持拍冷門題材，好難得。」
喊戲自由發揮
嘉玲在片中扮演闊太，過慣優越生活，但因丈夫突然失蹤而斷了經濟來源，她為面子而強裝，對人歡笑背人愁。「呢個角色真係幾適合我做，女主角生活背景或遭遇某程度上都幾似我。」是否曾像角色一樣跌落低谷？現年47歲的她表示自己到此年紀累積了很多人生經驗，都有助發揮：「我呢個年紀係最好嘅演戲時候，我有豐富人生體會，演戲上嚟比後生時多咗層次同角度。我覺得呢個係我最有信心、狀態最好嘅階段，不論做戲定做人，以至人生態度都係最好時候。」她坦言沒想過奪獎，認為小製作能參展康城已是鼓舞。
電影中，嘉玲在中段及尾段有兩場哭戲，發揮得淋漓盡致，嘉玲大表過癮：「我一路拍一路跟角色走段路，好快進入情緒。導演畀好多空間同自由我發揮，好過癮同開心。尾嗰場劇本冇要我喊，但當我見陳坤抱住老婆出車尾箱，見佢哋相依為命，自己連老公都唔見，女亦唔喺身邊，一時悲從中來。我設計呢個角色比較內斂，佢悲傷係好平靜，越平靜觀眾越心痛。」
活到老演到老
嘉玲又指家家有本難念的經，不是其他人看到的理所當然，她與偉仔也如此：「正常會發生嘅事都會發生，所有感覺都會有。人就係咁，甜酸苦辣缺一不可。」她又反問記者可有看過金像獎最佳外語片《愛》，因她渴望像86歲的女主角艾曼妞烈華一樣，活到老演到老。問她是否希望跟偉仔甜蜜到老？她冧爆說：「咁呢個當然希望啦！」幸福之情溢於言表。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！