商交所因財困而停止交易，繼而導致主席張震遠停做公職，成件事同港交所（388）前行政總裁周文耀好有關係。此話何解？當年係前特首曾蔭權倡議香港發展商品期貨市場，周文耀唔聽話，認為唔適合，唔肯做，張震遠於是攞嚟做，結果咪證明周文耀有先見之明囉。
曾蔭權喺2006年忽然建議香港發展商品期貨市場，指中國「十一．五」規劃下，商品、能源同原材料創造需求龐大，將會為香港帶來機會。
特首開到聲，政策局同港交所都要做嘢，雖然周文耀一早認為商品期貨在港缺乏商業模式，根本冇得做，但循例都有做研究，之後決定唔做。
數碼港主席要追欠租
兩年後，張震遠就大鑼大鼓宣佈成立商交所，所以話，如果唔係周文耀唔肯做，張震遠點會走去搞呢？不過咁都未完，周文耀2010年辭任港交所行政總裁後，被委任為數碼港主席，商交所寫字樓正正喺數碼港，傳聞仲要欠租，睇怕周文耀要搵人去追數。成件事係咪同周文耀好有關係吖！
查實商交所做呢門新生意，情況有些少似當年嘅甘泉航空，甘泉航空以長途廉航作招徠，獨沽一味，以為好有市場，結果因為長期虧損而結業，佢唔明白，國泰航空（293）其中一個成功原因，係網絡夠廣，用賺錢航線補貼蝕錢航線。商交所冇一門帶來穩定、豐厚收入嘅生意墊底，齋做商品期貨，咁就出事了。
李華華
mailto:[email protected]