「梁粉」最近鑊鑊新鮮鑊鑊甘，「超級梁粉」張震遠更捲入商業罪行案件。吖，立法會秘書處噚日唔知攞景定贈興呢？佢哋幫議員準備晚宴時，甜品嘅選擇中，竟然多咗「涼粉」畀人揀，令唔少議員喜出望外。等咗𡁻「梁粉」好耐嘅卿姐，第一時間將大大碗「涼粉」吞落肚，佢搞gag話，立法會仲提供埋糖水㖭，相信愛「糖」同走「糖」議員，都一樣有興趣品嚐。唐營猛將林大輝就話「梁粉」以外，宴會廳其實曾經都有過「涼粉」存在，但自己從來唔攞嚟食，「我真係啃唔落，邊度會啃得落？」佢話近排睇到新聞，「笑到流眼淚」；睇嚟佢唔使食涼粉，個心都好鬼涼快。