娛圈藝人愛chok，林峯、謝霆鋒，甚至中女伍詠薇，無時無刻都chok爆示人，不過就算冇佢哋咁好嘅外在條件，大家一樣chok得起。近日網上瘋傳用一包未開封嘅熊仔餅，猛力勁chok大約30分鐘就會變成朱古力波，鄧紫棋（G.E.M.）仲呼籲粉絲試吓，但係佢哋未試前，馮仁昭噚日就搵咗林盛斌（Bob）同細細粒（陳嘉佳）去接受挑戰。
滿足食落肚
阿Bob同細細粒先跳part舞熱吓身，然後就左右手各拎住一盒熊仔餅當沙鎚係咁chok，近日積極健身嘅阿Bob，玩住呼拉圈，甚至做住gym，佢都盒不離手chok chok chok。而細細粒自爆前晚曾經喺屋企試玩成功，所以佢有經驗，可以咬住魚蛋同玩住iPad咁單手去chok。大約半個鐘之後，阿Bob同細細粒分別要交出成績表，結果阿Bob成功chok出朱古力波，輕敵嘅細細粒就只係chok到人如其名嘅細細粒波波。
阿Bob話：「呢個係好好嘅親子活動，我打算返去同兩個囡囡試吓玩。」細細粒嘅貼士係：「真係講耐性，我噚晚喺屋企chok咗兩盒，玩完好滿足咁食咗落肚。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！