智取大市:港人炒日股 註定蝕桌 - 晉佳

智取大市:
港人炒日股 註定蝕桌 - 晉佳

美金兌日圓去到102、103左右,日本經濟財政大臣甘利明都話唔好再跌喇,再跌反效果會出嚟,理論上會為超買嘅日股帶嚟考驗,因為日圓呢個位無論升定跌,都有理由令日股中短線見頂。不過,師傅教落,股市係咁喪升嘅時候,咪亂估頂。
講開日股強勢,晉佳諗起自己炒股其中一個習慣,就係少沾手自己唔識當地語言嘅股市,至於業務據點喺唔識語言嘅國家,都要加倍小心。我哋算幸福,炒股嘅港人普遍都識中文同基礎英文,起碼炒港股、A股、美股甚至英股都少啲障礙。強如「歐洲股神」安東尼.波頓,之前買內地民企股都輸到趴街,仲要輸喺香港人明知係賊嘅寃枉股身上,佢條team決策人唔識內地文化係關鍵原因,至起碼唔識中文嘅外國投資者要知道相同嘅壞消息,最快都已經係第三手,喺中國股市騙局無數之下,輸死風險大增。

收風慢幾拍 寧揀ETF

另一個活生生嘅例子,係1月尾隻亨得利(3389),俾壹仔唱衰,結果股價跌十幾巴仙,最好笑係壹仔報道出街後,上半日市隻股都冇乜點郁,下晝兩點幾先嚟係咁跌,原因係有外資芬佬重倉,但偏偏壹仔冇英文版,當佢哋睇到彭博等外電轉載報道時已經係下晝,然後至識得掟貨。
芬佬要消化中文版壞消息都要成半日以上時間,換轉係香港散戶,要消化日本個股嘅壞消息,可能要慢日本仔超過半日,到時要沽都遲人n步啦。
唔精通日文、唔識日本人文化嘅香港人去買日股,同外國投資者去買亨得利差唔多,人哋主場通晒天嘅事,作客嘅我哋遲遲都唔知,註定蝕桌。
不過,如果成個世界淨係得日股係當頭起,他朝再好炒啲,都冇理由因噎廢食,為免收窄主場作客嘅差距,要買就寧願揀日股ETF,例如價值日本ETF(3084),再唔係就買業務國際性,例如豐田嗰啲超大路日股就算,怕波幅唔大?最多開大少少槓桿囉。

晉佳
本欄逢周一、三及五刊出