英超煞科，焦點除費Sir榮休外，可能係阿仙奴同熱刺爭歐聯席位最肉緊。其實車路士對愛華頓一役，亦係兩位教頭賓尼迪斯同莫耶斯最後一戰。兩位教頭，反映現代領隊辛酸。
世俗自古跟紅頂白。上季文仙尼憑「奇蹟兩分鐘」奪冠即被捧上天；今季英足盃失諸交臂，個個指住佢額頭話「渣嘢！」，仲被掃出門。紐卡素的柏度，季中找來多位法甲兵救亡，即又贏車仔，歐霸盃又晉級，英傳媒大讚：「法甲兵同聲同氣易埋班，妙！」豈料及後狀態下滑，跌入護級漩渦，竟又有傳媒歸咎：「太多法甲兵，自成一國唔團結！」同一原因，可以唱好又可唱淡，咁似朝早電視啲股評？一句講晒，成績等於一切。
但睇肥賓遭遇，就知原來有成績都未夠！一上任就被球迷當仇人；噓足半年後，最終他為車仔贏得歐聯席位，以及史上首個歐霸盃；仲令林伯回勇，成球會史上入球最多球員；仲令費托入番波，而且入親都係關鍵。諷刺係，煞科後的歐霸盃繞場慶祝，肥賓都唔敢企出嚟太張揚，驚引起反效果。可幸仍有部份良知球迷整橫額多謝佢。以本季成績，肥賓確實該獲更多掌聲。
至於莫耶斯，11年無冠都唔使炒，係咪易撈？講笑咩！年年無錢買人，仲多數有主力流失，俾着其他教練，拖肥可能一早降咗班。莫耶斯的「蔗渣價錢，燒鵝味道」，講就易，真正做到又有幾個？無冠領隊，卻最獲球迷擁戴；跟紅頂白的社會，好彩仲有呢班忠心球迷。
方柏翹
now足球評述員