鄉議局由九龍塘搬竇去沙田石門已經兩年，其間一直好努力將九龍塘地皮甩手，點知前年用咗約1.7億招標唔成，舊年3月索性開天索價，叫價兩億幾再招標又唔掂，到11月再改以拍賣形式放售，點知拍賣前冇耐，狼振英推出買家印花稅同額外印花稅，搞到拍賣價跌到1.9億都唔夠。
正當鄉議局驚賣唔出之際，終於有買家喺較早前，肯以1.78億啃咗幅地，鄉議局執委會噚日亦正式通過呢單交易。其實鄉議局為咗起新大樓，用咗唔少錢，到家陣仲差2,000幾萬未找數。據聞成功賣地兼還清所有工程費後，約有1億落袋，鄉議局初步打算用筆錢買樓收租幫補將來使費。