香港建築師學會噚日公佈新一屆建築大獎得獎名單，境內同境外兩個建築大獎，分別由政府建築署嘅和合石橋頭路骨灰龕及紀念花園，以及嘉柏建築師事務所喺佛山嘅北滘文化中心奪得。嘉柏設計總監余嘯峰估計，作品得獎同佢哋放棄內地常見嘅浮誇設計，打造平民化建築有關。同內地市場相比，余嘯峰認為喺香港搞建築設計較綁手綁腳，唔單止受好多條例局限，香港建築亦越見單一，「冇晒呢個城市嘅特色，例如我自己最懷念嘅六十年代小社區特色」。佢又批評港府同本地發展商經常將大型項目交畀外國建築師，本港年輕建築師機會有限，影響行業發展。