自由黨正式黨政分家，首任黨魁一如所料由榮譽主席田北俊出任，主席續係周梁淑怡，榮譽主席則係劉健儀，呢次改動真係零驚喜。獲黨友祝賀任黨魁嘅田少，噚日風騷談Plan B。佢認為中央可能會再多睇狼英表現一年半載再作決定，與其討論2017年有乜嘢特首人選，倒不如隨時討論2015年有乜嘢替補之選。田少有乜嘢心水呢？佢話林鄭算係夠資格，反而唐唐、范太同曾鈺成都唔會再有機會選特首㗎嘞。
前資深內會主席劉健儀替田少開心之餘，不忘鬧爆曾鈺成任意剪布，開咗好壞先例，呼籲各黨派討論點樣修改《議事規則》，防止主席任意剪布，權力無限大。