NBA雷霆駐紮地奧克拉荷馬城，近日受到龍捲風吹襲，造成多人喪生。龍捲風雖然帶嚟極大破壞，但係就捲唔走人情味；一班球星知道事件之後，即時呼籲球迷要幫奧城祈禱同捐款。亦有大學棒球隊喺當地比賽，災難之後即時買物資捐贈災民，身體力行為奧城打氣！
火箭控衞林書豪雖然喺夏威夷嘆緊世界，仲將玩樂相放上instagram，但係知道風災發生後即時上twitter，話會為死難者祈禱，真係好有心。
而雷霆一班球員應該都去晒度假，所以就未有聽到有雷霆兵受到影響嘅消息。杜蘭特一聽到消息，第一時間就喺twitter呼籲奧城市民要小心：「為受到龍捲風影響到嘅奧城受害者祈禱，大家要小心呀！」佢又呼籲大家捐款畀美國紅十字會去幫助災民。
眾星齊齊撐奧城
至於今季回歸雷霆嘅老將控衞費沙，亦好有心咁整咗個奧克拉荷馬州嘅剪影，仲留言話：「為風災影響嘅人祈禱。噚日同今日嘅龍捲風摧毀咗我哋嘅社區，我嘅心與奧克拉荷馬同在！」佢隊友柏堅斯就叫球迷買印有為奧城打氣字樣嘅tee，所有收益都會捐去紅十字會。至於金塊前鋒伊古達拉，亦好有心咁第一時間捐錢畀紅十字會，仲cap圖放上網，有呼籲作用之餘，亦為球迷示範咗點捐錢。
另外，西維吉尼亞州大學棒球隊咁啱喺奧城比賽，全隊上下好彩平安無事；教練仲帶埋班球員，去做到生意嘅超級市場，買物資畀災民，落手落腳去賑災，認真抵讚。