萬科置業（1036）上周獲阿媽注入港鐵（066）荃灣西發展項目，進一步奠定其萬科海外旗艦地位，消息令一眾內房殼股炒起。去年9月獲內房四大龍頭之一金地集團入股嘅金地商置（535），噚日則因為另一單消息爆上。事緣公司發通告，向合資格人士授出4.65億股購股權（option），其中七位董事獲授1.74億股，行使價為0.792元，有效期十年。事實上，公司發購股權後大升例子可謂多不勝數，就以噚日推介嘅億和（838）為例，舊年11月向六名董事授出購股權後，股價即如坐火箭，短短兩個月炒高四成。
睇番金地商置，阿媽入主後未見有大動作，只係4月喺瀋陽買咗幅地皮，話唔定今次發購股權，就係阿媽準備發動注資攻勢嘅訊號，以增加咁多位管理層嘅作戰動力。
睇圖表，金地喺0.80元水平橫行咗成個月後首現突破，昨收0.85元，升7.6%，成交大增七倍至121球，動力十足，齋以注資憧憬秤，現價上車值博率極高。
唐牛