港交所（388）經常呼籲上巿公司搵多啲女性入董事局，上月即刻加入一名女將，即係由政府委任嘅恒生銀行（011）前一姐梁高美懿做獨立非執董。
梁高美懿亦即刻配合，支持由港交所僱員發起嘅組織女菁匯，又介紹咗唔少女性朋友，加入各大公司嘅董事局。
女菁匯撐「港女」
女菁匯旨在喺港交所內部推動各項政策，支援女性擔任領導角色，梁高一定支持啦。噚日佢出席呢項活動時仲自爆，話唔少公司想搵女董事入局之前，都會私底下問佢意見。
之但係，現代女性除咗事業，仲要顧及家庭仔女，要佢哋擔當重要職位都唔係咁易。就連梁高都話，事業同家庭真係好難兼顧，一係好似佢咁，等到兩個囡囡都大晒，先可以全心投入做董事工作。
佢好坦白咁講，家陣喺職場上拼搏嘅女董事，如果唔係好似佢咁囝大囡大，就係未結婚或者冇小朋友，好少見到湊住幾歲小朋友嘅女人做董事。
咁講到底，多啲女董事對一間公司有乜好處呢？港交所CEO李小加打趣話，「我原本想講『女性做嘅決定啱啲』，但由我口講出嚟，就唔係太真心！」於是佢就改口話，董事局有男有女，意見會平衡啲喎。
李華華
mailto:[email protected]