喪屍遊戲玩唔少，殘忍核突兼血腥的畫面亦屢見不鮮，如開槍射爆頭、鋸手也屬等閒事！PS3新作《The Last of us》以荒廢城市為主題，苟姑娘更化身遊戲女主角Ellie，拎起長槍甚具型格，但要成功逃脫，還得借助求生本能，以及避開喪屍的追捕，純靠槍械保護自己？唔Work啦！
記者：陳國輝
攝影：林栢鈞
陰招暗殺 逃跑最實際
想好似《生化危機》咁，不斷怒射喪屍過關？在《Last》絕對唔Work！話明求生遊戲，硬碰硬必死！遊戲亦設定主角的身體好虛弱，最多頂到兩、三下攻擊，加上所謂的武器會不斷損耗，想成功逃脫，苟姑娘都話逃跑最實際！
一些應付喪屍的小貼士，大家可作參考；例如要避過喪屍發現，可執拾地上的磚頭或玻璃樽，掟到另一處引開對方，又或者長按R2的聆聽模式，留意喪屍位置，然後再兜路走；萬一真係非殺不可，你亦可以拎起磚頭，彎低身走去喪屍背後，再快速重擊「爆佢缸」！
爆衫女喪屍 奇醜極惡
《Last》的風格似曾相識，皆因佢由《Uncharted》製作公司開發！玩家遊歷的版圖，不單有淪陷的大城市景觀，其它還包括破舊的街道及民居，同時四周滿佈植物，簡直係真正的城市森林！主角任務就係要生存，途中你會發現好多天然資源，只需加以利用，便能一步一步過關；例如試玩模式中，石屋對面有一塊木板，你先將佢搬到石屋旁邊，然後爬上天台，再把木板另一端掟過對面小屋，就能形成一條「橋」作逃生用途。老實講，過程真係幾繁複，但只要你能投入遊戲，當每一樣東西都是真實資源，或許你好容易就知道點用。探索、解謎之餘，別忘記城市內仲有大量受感染的人類！《Last》大致將他們分為兩類，包括外表跟正常人好似，但聽覺敏銳，視力好差的Runner，另一類則是全身和頭上長滿大瘡，奇醜無比的Clicker，佢無視力，但靠超音波便能感知周圍環境，而且速度與攻擊力亦相當高，要對付佢絕對唔容易。
《The Last of us》中英文合版
機種：PS3
類型：動作求生
開發：SCEI
遊戲人數：1人(最多8人連線)
發售日期：6月14日
限量版要預訂
除了中英文合版，還有多款同捆珍藏版推出，包括鐵盒珍藏版、迷你插畫集特典版，及情景模型典藏版三款，內含遊戲鐵盒、手掣貼紙、漫畫、插畫集及模型精品，由5月24日起便可到Playstation@Platinum Shop作預訂。
