首富李嘉誠同商交所主席張震遠兩位城中熱話主角，噚日齊齊逃避傳媒追訪，不過張震遠友好，即係特首CY今日應避無可避，事關五月藝壇盛事「巴賽爾藝術展」（Art Basel）明天正式開波，今日舉行開幕禮，CY係主禮嘉賓，但按事態發展，佢應該以警方查緊商交所為由，唔評論。
講番Art Basel，聽聞機構想做贊助商都唔係咁易，佢嘅主要贊助商係德銀，本港地產商只得太古地產（1972）有份贊助，仲可以整一個主題貴賓室，而全場得三個主題貴賓室。太古地產除咗拎一筆錢出嚟贊助，仲要自己設計同埋攞錢搭建呢個貴賓室，其中一個用途就係可以招呼友好。
聽聞太古地產CEO郭鵬（圖）覺得贊助藝術文化有意義，即使對方咁多要求都認為值得。郭鵬星期五仲會喺貴賓室搞雞尾酒會，招待啲合作夥伴同各界友好。