噚日係黃偉文（Wyman）44歲嘅牛一，一向喺圈中多老死嘅Wyman獲唔少好友賀壽，成班人仲同Wyman搞咗個生日派對，畀面出席嘅有容祖兒同男友劉浩龍、徐濠縈、張敬軒、黃耀明等，就連近期是非纏身嘅鄧萃雯一落機都即刻飛撲同Wyman慶祝，不過睇晒成張大合照，都唔見話想要Wyman捐精畀佢嘅何韻詩，原來阿詩喺內地做緊《賈寶玉》巡迴，自然就有藉口唔到場，唔係見到祖兒同師兄喺度，場面就好鬼尷尬。
如妃晒合照
雯女雖然同《金枝慾孽貳》班人唔多啱傾，但同Wyman班朋友又好friend，佢仲同被稱為「皇上」嘅軒仔老友鬼鬼，合照完又喺微博寫：「終於皇上跟如妃娘娘同場出現了。」壽星仔Wyman百無禁忌，竟然喺微博留言：「剛好到了『西施死時』的年齡，哈哈哈，百無禁忌，不但要活下去，而且要活得更好，共勉之。謝謝大家！」佢自爆每年都喜歡搞生日會，仲以半威脅朋友嘅方式要佢哋捧場，但竟然被朋友投訴辛苦嚟到但壽星卻掛住玩手機，Wyman即死撐話：「親愛的，把你放身邊然後不理你，自己安心做其他的事情，就是現代人愛的至高表現呀！」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！