踏入粥舖，總聽到陳老太的溫暖問候「皮蛋瘦肉粥，走花生，多葱，加多碟齋腸？」舊區令人留戀，樓下做開街坊生意的世叔伯，對Samantha飲食的了解程度，僅次家母。新年他們還會塞上利是，待我如細蚊，這股滿溢的人情味買少見少。近日驚聞呢間粥舖關門大吉，原因是租太貴！
不少本港著名食府近年抵受不了租金壓力而結業，最新個案是銅鑼灣的利苑粥麵，以為旺區命運才會如此坎坷，未免太天真。自從政府落力發展九龍東，不少跨國企業落戶，炒貴該區地價，有物業代理預期九龍東寫字樓租金今年有15%至20%的上升空間。
寫字樓炒風都算，但陳老太這種只為兩餐，靠賣粥養起一家人的小店就慘受牽連。佢哋捱過97年金融風暴，03年SARS，連08年金融海嘯都咬緊牙關過渡，最終要執笠的原因唔係兩老做唔嚟，亦唔係經濟差，而係因為量寬錢太多。最諷刺的是，同一條街已出現多間吉舖，Samantha就快粥水都冇得食！
Samantha
本欄逢周三、五刊出