季尾同曼聯反面，要求離隊，又俾費格遜雪藏，朗尼最近都幾運滯，但佢喺周二凌晨終於收到個好消息沖喜，老婆高蓮幫佢誕下次子阿Klay（全名Klay Anthony Rooney）。
取名Klay重7磅11.5安士
喺英國時間周二凌晨，27歲嘅朗尼透過twitter公佈呢個好消息：「我哋嘅靚仔阿Klay喺凌晨2點11分出世，重7磅11.5安士，母子平安，我哋全部人都好開心呀！」（小圖）高蓮其後都喺twitter公佈喜訊。
睇番時間，朗尼喺BB出世後個半鐘發出呢條消息，睇嚟佢都好心急，想全世界一齊同佢分享添丁嘅喜悅。盡得朗尼肥仔嘜嘅遺傳，Klay仔一出世就已經7磅幾重，但其實都唔夠哥哥Kai仔勁，Kai仔出世嗰陣有足足8磅2安士。到周二中午，朗尼將一家四口嘅合照放上網，見到佢抱住Klay仔，由心度笑出嚟，不知幾甜，至少笑得開懷過英超捧盃嗰陣。
Kai仔出世事業彈起
朗尼呢個月扭計離隊，波又冇得踢，出親去公眾場合就俾曼聯球迷噓，就算勝利巡遊都係自己屈埋一角；我求大俠覺得，Klay仔出世呢日應該係佢近來最開心嘅時間。我哋中國有沖喜呢樣嘢，希望Klay仔出世可以幫到朗尼轉轉運，無論下季留唔留喺曼聯都好，佢都可以重登職業生涯嘅高峯。
我求大俠諗番Kai仔喺09年11月出世之後，朗尼嘅事業的確去到另一個高峯。因為嗰季C朗離隊，朗尼終於可以擔正，喺09/10球季嘅英超入咗26球，排射手榜第2，僅次杜奧巴。跟住佢扭一扭計，曼聯仲焗加人工畀佢，名利雙收！唔知Klay仔今次又可唔可以幫到老竇呢？
