面對一個爛攤子，梗係早走早着！上任僅僅九個月嘅新聞統籌專員（Information Coordinator，簡稱IC）鄧惠鈞June，上月以「眼又矇、耳又聾」理由向特首請辭，成為首個跳船嘅梁班子成員，雖然佢堅稱病魔纏身而不得不早點歸走，但政界中人唔多信，有人話佢被狼振英投閒置散，無奈下劈炮，更有人寸佢話，飛蚊症好common，使乜辭職呀？
查實舊年7月狼英上任後，一直搵人做IC，但搵嚟搵去都搵唔到，最終一個月後先請到年屆65歲兼已退休嘅馬會前公共事務部主管阿June重出江湖。但呢位專為特首制訂新聞公關策略嘅心戰室成員，話咁快就宣佈跳船咯。
阿June同傳媒講，上個月已向特首請辭，暫時未定離職日期。到底有乜嘢病痛？做過第一代矯視手術嘅佢話，本身對眼唔係咁好，上任後要睇好多文件，好容易覺得好攰同頭痛，已經患上飛蚊症兼白內障，呢幾個月仲有耳鳴，有時持續24小時㖭呀，影響睡眠質素，無奈辭職囉。特首辦發言人證實阿June以健康理由辭職，但冇講幾時last day。呢個專員職位職級相等於首長級第四級，月薪約18萬。原為資深傳媒人嘅阿June，上任後未見任何表現，莫非真係健康原因令佢無法發威？
嫻姐寸：飛蚊症好common
有熟悉阿June嘅政界中人爆料，話阿June上任後好得閒咁款，似乎被梁振英投閒置散。自由黨田少都質疑，阿June唔係核心梁粉，可能好多意見都被中策政策組嘅邵善波拒絕，做得咁冇癮，唔執包袱可以點？
就連女士都唔多信佢喎。工聯會嫻姐話，飛蚊症好common，好多都市人都有啦；民主黨卿姐都質疑，佢因為同狼英合作不愉快而離場，但阿June堅持同狼英冇鬧不和。
鄧惠鈞小檔案
洋名：June
年齡：65歲
背景：
資深傳媒人，曾任無綫電視新聞部總監、其後加入馬會任公共事務部主管
梁班子資歷：
原已從馬會退休的鄧惠鈞，去年8月加入政府任新聞統籌專員，昨天證實已向特首請辭
資料來源：《蘋果》資料室
mailto:[email protected]